التخطي إلى شريط الأدوات
شِعرمشاركات أدبية

أبو سمرة العاشق.. شِعر: ماهر مهران

شِعر: ماهر مهران

ما بيملكش من الدنيا دي

غير عشة صغيرة، الاسم بيت..

ما بيملكش من الدنيا دي

غير محبة، ووش بشوش، ودفا الحواديت!!

ما بيملكشي غير شوفه

عشان كده الناس لمّأ تشوفه

من قلبها تهتف وتهلِّل

وتنزل فطفيط:

أهو جه بخيت!!

أهو راح بخيت!!

يا أسمرانى  يا سمارة

القيد في اليد أمارة

عايش في دنيا خمَّارة

بني آدم يشبه لسجارة

في إيد الأصحاب

تتحرق وتكتم جواك أشواق وعذاب

يا أبو قلب أبيض ندهه العشق

وخطفه لحد ما في البت البيضا

اتدهول وعشق وحب وداب

عشق من غير حساب

عشق غزالة حلوة بتتدلل

تقلع قلبه لو تاقف

وترعش ركبه لو يبعد

تجننه لو تضحك شخبيط

أهو جه بخيت

أهو راح بخيت

تقول أنا غبت في العشق واتهريت

أنا دُبت واستويت

طب ليه يا بخيت؟

مالك يا حزين بالعشق

دا أنت مرهون للجوع

يا ناشف زي عضم الكوع

كيف تعشق بت طرية زي عجين القمح؟

كيف قلبك اتعلم في هواها الرمح

وحالف في هواها ما يهمد

وكل ماتشتاق لها تعند

وتسيبك للمرارة..

يا أسمر، يا أبووش بشوش

يا درويش، ياسمارة..

يقول أُلطف يا رب

من شفتين نار

من خد شبه الجنِّة

من مشية بتزرعها دمار

من عين أحلى من الحنِّة

من بت فيها نار وجنة

ويشق الجلابية

ويقول الدنيا هيَّ

حبيبتى البيضا الصبية

اللي رغم جنوني

ونشف ريق اللي جابوني

باسقي الناس محبة

وعشق ومعشقة

أقول له: طب بالراحة

واعشقها حبة حبة

دا قيدك حازز في العضم

وحزنك ملضوم لضم

وأنت طول عمرك فقري

لا دقت شهد الدنيا

ولاعمرك دوقت اللحم

ولا زاد منك فتافيت..

أهو جه بخيت

أهو راح بخيت

في عينيه ملاك

في إيده مفيش غير الحواديت..

أهو جه من ضلمة

أهو راح في ضلمة

يا دنيا ظالمة

بتحرميه ليه من كل حاجة

وتتوصى بيه في الشلاليت

وفي الطيابة وعشق الصبايا!!

آه يا بايا

يجوع بخيت

يشوفها رغيف بلدي طالع م الفرن

يعطش بخيت

مايبلش ريقه غير صبره على الحزن

ترحل حبيبته

يقلع جذوره

ويقول لصحابه

هيَّ الأرض اللي فيها مكتوب لي أعيش

يبقى راهب

يعيش درويش

يخاصم أبوه ويسجن أخوه ويضحى ف ولده

وعشان نعيمها يكوُّن جيش

ويهديها ف كل طلعة شمس

غنوة وفراشة

ف تفتِّح وردها للأجلاف وللشراميط!!

شفت يابخيت

قلبك خوُّاف خاف يصارحها

ف عشت في الدنيا دي عاشق حاف

ما حضنتش ريحها

وهي بكل جسارة..

تشعلل نار الشوق جوَّاك

تستمتع بتعذيب اللي جابوك

تعمل من لهفة عينك حرب وغارة

يا أسمر يا أبو قلب أبيض يا سمارة..

الكل خانوك

ف ابعد عنها ولو ثانية

دا البت حلوة قوي شبه الدنيا

والدنيا عمرها ما كانت ناصفاك..

يقول لي:

حبيبتي شمع وتقلية

وعشقها في الروح ساكن

حبيبتى شهد وعسلية

قمرة للكون الداكن

حبيبتى مية في ضهرية

بتصبها إيدين غجرية

بتحييني كل ما يملكني الموت

وتخوني الدنيا الجبارة

أضحك وأقوله:

فوق يا سمارة

وبص للزبدة حبيبتك

تلقاها ساحت في حضن البيض

وسابتك هايم في الدنيا

تجوع تشوفها رغيف فاير

تعطش تشوفها مية ف زير

تتغرب تشوفها

عنبة وضليلة ولمة وبيت

تتوه تشوفها هي بخيت

الأسمرانى أبو الحواديت

اللي عشق بكل كيانه

راح الزمن باعه وخانه

وسابه على الناصية ملاك مجروح

بينزف قدام الناس أوجاع!!

اظهر المزيد

بهاء الحسيني

كاتب وناشر، والمدير التنفيذي لدار بوك هاوس للنشر والإعلام، ومؤسس موقع كُتُب وَكُتَّاب "منصة إلكترونية ثقافية متخصصة". حاصل على دبلومة الإعلام الرقمي من الجامعة الأمريكية بالقاهرة، مركز كمال أدهم للصحافة التلفزيونية والرقمية، واجتاز العديد من الدورات التدريبية في الصحافة من مؤسسة طمسون، ومبادرة جوجل للصحفيين.

مقالات ذات صلة

اقرأ أيضًا
إغلاق
زر الذهاب إلى الأعلى