تلتقى الكاتبة نهى الجندى، فى السابعة من مساء السبت 23 مايو، مع القراء بمكتبة الشروق بالزمالك لتوقيع ومناقشة كتاب “اعرف طفلك وعلم عليه” والذى صدر حديثا عن دار الشروق.
لو لسه أم جديدة طازة، لسه مخلفة، لسه تعبانة نفسيًّا وجسمانيًّا من الحمل والولادة. بتحبى ابنك أو بنتك جدًّا لكن مش قادرة تحسى بمشاعر الأمومة اللى صدعونا بيها طول عمرنا، وحاسة إنك مش طبيعية.
يبقى ده الكتاب اللى بتدورى عليه.
مفيش حاجة هتهون عليكِ كل ده غير ضحكة طفلك وهو شبعان وبيبصلك عارفك إنتِ بس . نهى الجندى بتشارك كل أم – لأول مرة – تجربتها وبحثها بأسلوب ساخر لطيف من لحظة الولادة لحد سن الحضانة. تفاصيل تغذية الطفل وكيفية التعامل مع الفرق بين توقعاتك أو اللى قالولك عليه وبين اللى بيحصل فى الواقع، مرورًا بقائمة المشتريات المفيدة فعلًا وإيه اللى ممكن تتجنبيه. وكمان أفكار نشاطات مشتركة مع طفلك ونصائح مش هتلاقيها فى كتالوج الجدات؛ وكله من واقع يومياتها مع طفلتها الأولى
