شعر: محمد يحيى
يناديني من خلف الستاير شيء
..صوت خنيق
صوت يعادي كل الندا ع الصديق.
زمهرير مجمد كل المترحمين ع الصيف
أنا قلت: ادخل، منتاش ضيف لجل ما أقوملك
رشيت عليك السكر لكن مشوفتش نملك
حتى النمل خبيته في بيوته يا بخيل
طيب مين يونس وحدتي لما الليالي تضيق؟.
حزين ..
وزهر البنفسج نبت ع الضوافر
زي روح متجمدة بطلت تعافر
أنا قلبي كتيبة..
دايقة هزيمة وبتتراجع
فاقدة السُترة،
مكشوف عورتها لكل الواقع
عالم واقع وبيتشرط يبقى حليف
وأنا لسا من آخر جندي بهرب فيا
..وفيا نزيف
وأنا لسا من خلف ستاير بسمع شيء
.. ملهوش طيف
وبقوله: اتفضل ادخل منتاش ضيف
اقتل دفئ كوّن فيا شكل التعريف.
